الواحد هيجيله شلل نصفى من اللى بيشوفه على الفيس بوك !
امثلة :
-لما حد يكتب استاتوس نكتة او ألش (و دى الموضة السخيفة اليومين دول) و يعمل لنفسه لايك و يعلق : ((ههههههههههه جامدة جدا)) و يعمل للكومنت بتاعه لايك !
- لما تلاقى "كيرو" كاتب استاتوس و محدش يعبره و "مارى" كاتبها هى هى و واخده عليها 100 لايك و زيهم كومنتات !
-حد يكتب استاتوس : انا مخنوق اوى ...فالناس تسأله مالك فيه ايه ؟ يقول لا ولا حاجة ....طب لما هى حاجة خاصة و مش هتقولها كاتب ليه ؟ علشان تحرج الناس يعنى ؟!
- لما تلاقى بنت منزلة استاتوس و يتفتح شات ما بين "لوووول" و "ههههههه" و يوصل ل 60 كومنت بين اتنين بس !
- لما بنت تكتب كتير عن الحب و الغرام و ترجع تتعجب او تتضايق ان الناس كلها عارفة انها فى علاقة حب !
- لما تقرأ استاتوس "لا تجعل الاولوية فى حياتك فى شخص لا يجعلك الاولوية فى حياته" للمرة المليار و تلاقى الناس بتعلق : جامد جدااااااااا واااااااو انت حد بيفهم و كانهم اول مرة يقروه !!!
-بنت عندها 12 سنة تحط صور حب و قلوب و "مهند" او "تامر" و ولد فى نفس العمر يكتب محدش بينجرح اوى غير لما يحب اوى و يدخلوا اصحابه يواسوه !
-لما الناس تكتب انجليزى معرب (فرانكو)
حاجة غريبة و مستفزة (ليا شخصيا) بجد ما هو يا اما تكتب انجليزى انجليزى لو عامل فيها اجنبى يا اما عربى عربى لو هتقضى البساط احمدى ...مش فاهم لزمة الفزلكة دى ايه !
-صفحة : مطلوب تجميع 1000000 محب لمارجرجس.... طيب و بعدين بعد ما تجمعوا هيعملوا ايه ؟؟؟!
-رسالة : اقبل يسوع و ارسله لاصدقائك و لو رفضت ارسال الرسالة تذكر انه قال : من ينكرنى قدام الناس انكره قدام ملائتكى ..و فى خلال نص ساعة هيجيلك خبر حلو ....لا تعليق
-لينك : ادخل هنا و سيتم شحن موبايل بمية جنيه (فايرس او spam) ...و تلاقى ناس كتير دخلت عليه !! ...يعنى بذكائك هما بيوزعوا عدية و لا فاتحينها سبيل ؟!! ويرجع يستغرب ان الأكونت بتاعه اتسرق !
سؤال : هل انت فخور بكونك مسيحى ؟
نعم - لا
ده على اساس ان فيه مسيحى مش فخور و هيقول : لا ؟؟؟!
و الاغرب انك تلاقى 100 واحد مسلم مختارين لا !!!!!
-سؤال بأستطلاع : ما هو دينك ؟
-المسيحية و اعتز
-الاسلام و اعتز
-اليهودية و اعتز
-ليس لى دين و اعتز
ده على اساس ان نتيجة الاستفتاء ده هتحدد ايه يعنى ؟!!!!
اقول ايه و لا ايه بس !
الجمعة أغسطس 15, 2014 3:26 pm من طرف 
